Begleitet dr Attila ufem Wäg ans Dorffescht und lernet Zunzge kenne!
Sali zämme; ich bis, dr Hunnekönig Attila.
Dir kennet mi villicht us de Sage übere Büchel, ‘s Wohrzeiche vo Euch Zunzgerinne und Zunzger.
In de neggschte 12 Mönet wird ich Euch einigi interessanti Gschichte, Aläss, Brüüch und Sage rund um Zunzge nöcherbringe. Als absolute Höhepunkt wärde mir denn vom 25. – 27. Auguscht 2023 äs riise grosses Fescht zämme fyyre! Bis es sowitt isch, loh ich jede Monet öpis Neus vo mir ghöre.
Siter drbyy? Bis glyy – Euche Attila
Mini neuschti Errungeschaft findsch immer z’oberscht.
Drück ‘s Plus (“+”) näbem Titel und erfahr, was mir in däm Monet passiert isch.
Illustrationen: Roman Hofacker
Vorme Joor het er afo brichte
Eus unterhalte mit sine Gschichte.
Gfunde het er zwar kei Schatz
Drfür im Dorfchärn e neue Platz.
Ganz zu Ehre vor Helvetia
Zündet er s‘erscht‘ Ragetli ah.
Er freut sich aber umso meh
Bald villi Lüt dört fyyre zgseh.
Dr Attila wünscht allne Gäscht
Es sagehaft, tolls Fescht.
Mit Orangesaft und schigger Brülle
Duet dr Attila in dr Badi chille.
So erlöst, grad churzerhand
Er sich vo sim Adelsgwand.
Si Wöschbrettbuuch suecht sinesglyyche
‘s Kämpfe het am TV müesse wyyche.
Au het er sini Sunnecreme no gfunde
Rot-wyss ghört jo bitz nach witter unde.
Er isch parat und git sis Bescht
Nur no 56 Täg bis zum Dorffescht!
Es knallt, es hallt! Was mag das syy?
Isch d'Jagdsaison scho öbbe gly?
Nei, es isch an däm besagte Mai
Dr historisch Banntag bi eus dähei.
An däm spezielle Tag füehrt dr Attila
Die Bandi s'erscht mol z'vorderscht ah
Es hett ihm gfalle, meint er im Vertraue
Die vyyle Männer z'gseh - mit Chind und Fraue!
Hintergrund:
Der Banntag ist ein Brauch in vielen Gemeinden im Baselbiet. Am 20. Mai 2023 fand der Jubiläums-Banntag auf Grund des 700. Geburtstags von Zunzgen statt.
Es rennt mit Chroone, ohni Schnuuf
Eine schnäll dr Wald duruf.
Er hächlet schwer, het d'Zunge duss
Dr Attila isch nüm im Schuss!
Sini Bei, die mache schlapp
Dr Schweiss tropft scho vom Körper ab.
Wie schön wärs jetzt im Pool dähei?
Doch leider gits no Rundi zwei!
Hintergrund:
Am 7. Mai 2023 findet der 33. Zunzger Waldlauf statt.
Im Büchel sig ä Schatz versteckt
Aber Gold het do no kein entdeckt.
'S wird vo Jumpfere, Geissböck, Ritter brichtet
Doch het dr Attila vo däm nüt gsichtet.
Au d‘Burg ufem Wappe isch erfunde
Me het nur Chnoche, Mässer, Schärbe gfunde.
So blibe die Büchelsage nume Gschichte
Wo me sich duet am Stammtisch brichte.
Die negscht gross Gschicht, die chunnt scho gly
Ändi Auguscht – bisch au drbyy?
Hintergrund:
Diverse Sagen zum Zunzger-Wahrzeichen, dem Büchel.
Si stoht in Sissach und duet eus trotzdem gfalle
D'Red isch vo eusere schöne Kunschtiishalle
Dört zeigt grad euse gliebte ZettEss (ZS)
In dä Play-Offs wyder Grosses.
Dr Attila hets als Gegner au probiert
Sich doch leider nur blamiert.
Und het bim Versuech go score
Leider grad dr Halt verlore.
So isch er einisch meh am Bode gläge
Und das nit mol dr tropfend' Decki wäge.
Hintergrund:
Zunzgen teilt mit Sissach einen Eishockey-Club.
Schmöcksch es au, de feini Duft?
's isch dr Gschmack vo Fasnachtsluft!
Au z'Zunzge muess me nüm lang warte
's tuet dr Plausch vo de Wurlitzer bald starte.
Doch zspoht isch am Attila igfalle
Zerscht isch doch no Guggewahn in dr Halle!
Doch alles zue, dunkel - dr Fruscht isch gross
Wird Strom gspart oder was isch los?
Nei Attila - si findet statt, die Guggesause
Doch jetzt vill Spass bim Spaziergang - uf Lause!
Hintergrund:
Diverse Vorfasnachtsveranstaltungen in Zunzgen. Diesjähriger Guggewahn findet ausnahmsweise in Lausen statt.
Und wyder goht es Joor scho zÄnd
Doch freuet euch, denn juschtamänd
Chunnts nöcher, euses Jubelfescht
Drum; liebi Grüess und nume 's Bescht
Für 's neue Joor, vom Attila
Und au vom OK hindedraa.
Hintergrund:
Jahreswechsel.
'S isch dusse wyder bitterchalt
Wenn d Balle duur d'Turnhalle knallt.
Chlausä-Cup, so wird er gnennt
De Unihockey-Grossevent.
Am Schluss, do darf dr Attila
Sogar no d'Goldmedaille ha.
Drzue wird er und das isch d'Krönig
Als König no Toorschütze-König!
Hintergrund:
Der "Chlausä-Cup" ist ein beliebter Anlass, organisiert durch den TV Zunzgen. Er findet bereits zum 26. Mal statt.
Erhallt dur Zunzge 's "Halali"
Isch Euse Attila do au drbyy
Mit Horn und Gwehr goht er uff d'Pirsch
Und hofft, er gseech e schöne Hirsch
Scho chunnt es Tier mit schönem Gwey
Er avisiert, macht gar kei Gschrey
Druckt ab und merkt -'s isch ganz vermässe
Er het däheime d'Schüss vergässe!
Hintergrund:
Die Jagdsaison ist gestartet - auch in Zunzgen.
Im Dorfchärn, dört stoht d'Sunne steil
Doch amne Ort ischs Gegeteil.
Es rägnet fescht - Dropf um Dropf
Am Attila voll ufe Chopf.
Das Wasser macht ihn total muff
Er spannt sis Räägeschirmli uff.
Jä Attila, jetz isch's halt so...
...muesch nit zum Räägemännli stoh!
Hintergrund:
Das "Rägemännli" ist eine Zunzger-Sage. Mehr dazu finden Sie im Buch "Baselbieter Sagen" von Paul Suter und Eduard Strübin.
Wo dr Attila ufe Dorfplatz lauft
(Im Volg no schnäll sis Znüni chauft)
Do schmärze ihm grad sofort d Ohre
Lutti Schuufle, Bagger und Motore.
Es erklärt ihm ein, ganz churzerhand
Me gäb däm Ort jetzt e neus Gwand.
Uf eimol duet bim Inspiziere
Dr Attila d'Balance verliere
Rutscht uss, isch voll ins Dräckloch gheit
Und het grad so dr Platz yygweiht.
Hintergrund:
Die Umbauarbeiten für die Sanierung des Dorfplatzes an der Hardstrasse haben begonnen.
Sattlet d‘Velos, es isch sowytt
In Zunzge isch wyder GP-Zyt!
Dr Attila mit Schwärt und Chroone
Radlet los wiene Kanone.
Doch merkt er nit, will er so schwitzt
Dass ‘s Schwärt vo ihm sis Rad ufschlitzt.
So chunnt drum euse Attila
Bim Zyyltuech halt als Letschte ah.
Hintergrund:
Der alljährliche Anlass "GP-Oberbaselbiet" in Zunzgen. Weitere Informationen findest Du unter: www.gpobb.com
